唔少候選人都鍾意喺選舉前後入住酒店，方便落區拉票。我哋尋日寫過青年新政游蕙禎同鄺葆賢入住兩晚酒店後，原來仲有灣仔大佛口選區候選人、家住屯門嘅灣仔廣義梁柏堅，佢喺選區附近酒店租咗兩間兩床標準房，一間租足星期六日兩晚，一間就只係租一晚星期六。佢同另一候選人各分擔一半開支，但就冇寫係邊個。灣仔廣義仲有司徒拔道選區女候選人區麗莊。
唔少人都識得淘寶買平嘢，好似灣仔樂活選區候選人、出名跳飯碗舞嘅蕭思江，就用咗一百二十元人民幣，折合一百四十多港元，買咗十二條禮儀帶。中西區區議會主席葉永成就淘咗五十個襟章，當中十個用咗喺選舉，申報用咗二十元人民幣，約廿四港元。