社會就性傾向歧視立法一直有好大爭議，政制及內地事務局成立咗「消除歧視性小眾諮詢小組」，話咁快任期到今日就屆滿。我哋收到風，小組主席張妙清今日會提交報告畀政府。當中大家最關心嘅立法與否問題，相信係由於分歧甚大，報告就未有結論，要進一步研究咁話。身為同志嘅小組成員、「慢必」陳志全一直要求就性傾向歧視立法，今次報告無提立法，睇嚟反枱都有之。
報告建議再進一步研究立法，相信對政府都係好事，起碼唔使點着另一個火頭，以時間換取空間。
據了解，報告除咗講立法議題，較為實質啲嘅建議，就係提議政府制訂自願約章畀唔同組織採納，推行反性傾向歧視政策，擴闊現時只涵蓋僱傭關係嘅實務守則。
此外，報告仲建議為社工、醫護等專業人士提供更多培訓，等佢哋服務性小眾時更為敏感；仲有加強反性傾向歧視教育。