中環出更：被指鎅票狄志遠斥侮辱
由民主黨（白鴿黨）前成員狄志遠及黃成智牽頭成立嘅新思維，尋日宣布有「強烈傾向」派員參與明年二月立法會新界東補選，但由於有多過一個成員表態有意出選，人選要經下月八號黨內投票選出。狄志遠否認出選係鎅走泛民主派選票，認為咁講係侮辱，扼殺咗市民嘅選擇及第三道路嘅生存空間。咁又係嘅，議席唔係任何黨派嘅私產，點解唔講成新思維被鎅票呢？
與黃成智「二揀一」出陣
狄志遠話，黨內經過四至五輪討論，前日晚上決定派員出選新東補選，但因礙於選舉條例，將在一月七號籌款晚宴，以及八號黨內投票再公布。據知，人選方面會係狄志遠、黃成智「二揀一」，但兩人各有支持者，所以黨內都未有一致共識。
公民黨早前宣布派出楊岳橋參加補選，被問及會否鎅走泛民選票，狄志遠斥鎅票係侮辱，認為第三條道路有自己支持者，同時佢哋成員有建制亦有泛民，所以要鎅票就兩方面都會鎅 。佢又覺得即使泛民今次在補選落敗，對立法會政治版圖影響不大，相信建制派唔會趁機會強硬修訂《議事規則》。此外，據聞本土民主前線發言人梁天琦及民建聯周浩鼎亦有意參加補選。
卓妮