中環出更：冬天不太冷 「春」來穿唐裝
香港善德基金會早前舉行成立一周年晚宴，唔少政商界名人結伴去捧場。近年愈來愈多機構籌辦大型戶外運動，成功製造嘉年華效應，創會主席董吳玲玲都好雀躍話，早前基金會首次舉辦一連四個周末舉行嘅「善德遠足百萬行」，號召逾三千人次參與，結果有啲朋友真係愛上行山，仲不時相約一齊去，確係意外收穫。
董太話，期待未來可將呢個有益身心嘅活動，打造成基金會嘅旗艦活動，提醒大家欣賞香港。卓妮見到裕華國貨董事總經理余鵬春（PC）及太太徐菊霞、基金會永遠名譽會長葉鍾佩雲及丈夫卓悅控股主席葉俊亨都有到場。仲未過農曆年，PC已經着住唐裝周圍去。佢解釋話，近期天氣時暖時熱，唐裝嘅好處係天氣凍時可以扣鈕扣到上頸，咁就冇咁凍喇！
葉俊亨盼零售難關已過
講起近期生意難做，投資市場多變，PC特別關注人民幣貶值令港元變得強勢，擔心會進一步減低內地人來香港消費嘅意欲，而港人就更有興致出埠旅遊，令本港零售生意雪上加霜。葉俊亨對淡市就睇得開啲，事關由佔領行動開始，零售業生意已經差咗，最近咪趁聖誕、新年等傳統消費旺季做多啲生意，拉上補下囉！佢仲話，希望最差嘅環境已經過去。
最近美國加息，一般預料本港息口將重拾升軌，好多人擔心樓價下跌，葉俊亨就認為對樓市影響唔會太大。不過，同場嘅新界社團聯會理事長陳勇就聲稱好擔心，事關佢仍供緊樓囉！
卓妮