幾年前，內地有套《舌尖上的中國》熱播，叫人回味無窮。不過咁，宣傳係一回事，事實係另一回事，家陣傳統美食買少見少，反而黑心食品推陳出新，無奇不有，如果拍套《舌尖上的黑心食品》，可能更受歡迎都未定。
唔係誇張o架，內地奸商好似魔術師咁，幾乎任何工業原料都可以變出色佳味美嘅食材，佢哋唔單止用香精、味精及色素溝出化學豉油及化學蠔油冒充真貨出售，仲研發工業鹽醃製豬肉及鹹蛋，工業冰醋酸製造白醋，工業酒精溝水當白酒賣，直頭要乜有乜，想乜得乜，令人嘆為觀止，諾貝爾獎委員會至今沒有將化學獎頒畀創意無限嘅中國奸商，簡直係有眼無珠呀。
點解內地奸商咁鍾意製造化學食品，咪就係見利忘義，為咗一個「錢」字囉。有業內人士表示，豉油釀造過程閒閒地要一年時間，以化學添加劑調製醬料，只需幾粒鐘就搞掂，既方便又快捷。講到成本更加平一大橛，工業鹽平過食用鹽一半，工業酒精及工業醋價格比食用嘅平均平三分之一，可謂本小利大，奸商為咗牟取暴利，連殺頭嘅生意都肯做，何況製造黑心食品吖。
講開又講，內地黑心食品無日無之，早已經唔係乜嘢新聞，奸商唯利是圖固然罪無可恕，當局坐視不理更加係助紂為虐。本報記者最近到廣州直擊製假工廠嘅黑幕，監管部門冇理由一無所知，你話當中無官商勾結，狼狽為奸，細路哥都唔信啦。
冇計啦，中國話就話係全球第二大經濟體，上天有神舟，落海有蛟龍，幾咁巴閉，弊在當局將面子睇得比老百姓嘅死活更重要，最終搞到華夏美食同黑心食品畫上等號，你話幾咁荒謬吖！正如有人諷刺，中國人嘅胃好似化工廠，取一個橫切面，直頭齊晒一百多種化學元素，近年中國多地出現癌症村，各種怪病、傳染病更加層出不窮，除咗環境污染，亦係因為食咗太多化學食品嘅咋。
民以食為天，食以安為先。內地百姓冇啖好食吖嘛，結果咪蜂擁而出，全球搶購囉。香港近在咫尺，首當其衝，搞到港人怨聲載道，加深兩地矛盾。仲有喎，香港食品除咗外國進口，大部分來自內地，內地食品出問題，香港冇可能獨善其身，孔雀石綠水產、蘇丹紅禽蛋、三聚氰胺奶粉、山東龍口毒粉絲，邊一次香港唔係受害者吖。
一句講晒，堂堂大國，連食安問題都搞唔掂，身為中國人冇可能有自豪感。一個巴掌拍唔響，香港出現「新本土主義」係唔啱，內地係咪都應該反思吓問題出喺邊度呢？