政情：有喜！肥亨出年抱孫喇！
將於明年一月一日出任港鐵主席的馬時亨（肥亨），未上任之前家中先有喜訊，就係準備明年做外公抱孫喇！話說尋日我哋見到肥亨女婿、願望成真基金主席劉仲恒（Kevin），佢話除夕會同太太、即肥亨大女馬露明去泰國曼谷Babymoon兼倒數，咩係Babymoon？即係兩夫婦趁小朋友出世之前去一個浪漫旅行，換句話馬露明現正懷孕喇。
女婿爆肥亨要孫陪打波
Kevin話，現時BB約十幾個星期大，外父肥亨得知後仲即刻講定，話個孫將來要陪佢打高爾夫球，認真搞笑。Kevin同太太四年前嘅Boxing Day結婚，呢幾年聖誕願望都係快啲生B，今年終於得償所願，可謂係最佳聖誕兼結婚周年禮物喇。
由於第一次生B，Kevin夫婦好多嘢都覺得好緊張同新奇，又話太太現時口味開始有變化，忽然對喜愛嘅甜品冇晒興趣，仲話已經搵定陪月員，但好嘅陪月員係好搶手喎。