政情：健髮全因「幕後黑手」
保險界立法會議員陳健波接任財委會主席後知名度大增，行街多咗市民認得佢，議會工作又愈來愈忙，都未見老態，六十一歲依然頭髮烏黑。陳健波笑言，太太以前學過師幫長者剪頭髮，佢個頭亦由太太親自操刀剪咗廿幾年，近年仲用天然草本染髮劑幫佢染髮，頭髮有咗太太呢位「幕後黑手」，想喺屋企立即變黑晒亦得，得咗！
推介杞子煲熱水明目
着重養生嘅陳健波又推介用杞子煲熱水明目，早前佢已經被我哋撞到佢買咗八大袋靚杞子返立法會畀建制派議員。佢自言三十歲時已經有九百幾度近視，但飲咗多年杞子水，近年做眼部檢查結果都好滿意。不過，其實點養生都係無謂，事關泛民主派議員再係無止境咁點人數「拉布」，佢就建議立法會秘書處將點人數嘅「催魂鐘」改為義勇軍進行曲，睇吓泛民仲敢唔敢點人數喎！