中環出更：續掌屯門區會？發叔「仲考慮緊」
現任屯門區議會主席劉皇發（發叔）早前因病住院，一直有傳佢會退下火線，唔再競逐連任主席，並由現任副主席、民建聯梁健文接棒。不過，我哋問番發叔，佢透過助理回覆話發叔「仲考慮緊」，又指距離截止報名仲有幾日，「畀佢（發叔）放完假先啦！」唔通屯門區議會換血存暗湧？
冇露面仍獲多人支持
卓妮問過梁健文，佢話未知發叔意向，但就話假如發叔願意連任，就算下月五日會議選舉主席嗰陣佢未能現身，佢同其他同事都會支持發叔喎。嘩！發叔全程唔使露面都有咁多人支持，大家對發叔嘅支持都好盲目吓喎，同支持張「空櫈」連任有咩分別？不過，有該區資深區議員透露，諮詢過發叔意見，指佢無意競逐連任，料由梁健文接任嘅爭議較少，具鄉事背景嘅古漢強就接任副主席。
事實上，身兼立法會議員嘅發叔近年已經鮮有現身立法會會議，今年中開始傳出佢身體抱恙，先係突然退任鄉議局主席，喺政改表決一役，當時已經盛傳發叔由醫院趕往立法會投票，自此發叔退下火線嘅消息更甚囂塵上。主持區議會工作比起出任立法會議員更繁重，發叔係咪堅持連任，日內就有答案。
卓妮