中環出更：博愛慈善籌款 懷舊美食搶風頭
博愛醫院董事局早前舉行慈善餐舞會，大玩勵志嘅獅子山下主題，現場用懷舊街景相片打造時光隧道，女士們紛紛着上旗袍及復古服飾，彷彿時光倒流，志在搵番拚搏嘅香港精神。現場仲有龍鬚糖及棉花糖等傳統美食車，博愛副主席彭少衍等董事局成員好落力「拉客」幫襯。美食車唔止應景，仲趁機舉行籌款競賽，難怪個個「檔主」瞓身搶客，氣氛熱鬧似趁墟喇！
當晚四架傳統美食車分派畀唔同副主席及總理們做檔主。賣龍鬚糖嘅副主席吳錦青話，童年回憶中嘅街邊小食已冇咗一大半，好似龍鬚糖咁，去山頂散步先見到有得賣，佢認為呢啲傳統飲食文化應該要保留及發揚光大。
候任主席獲家人老友力撐
經過一輪激鬥，結果由彭少衍做檔主嘅雞蛋仔勝出，賣棉花糖嘅副主席李柏成一樣咁開心，因為佢係今屆嘅籌委會主席，佢笑笑口話今年善款進帳情況唔錯。
博愛主席譚姜美珠、候任主席陳李妮（Lily）、總理林群及藍王雲仙等人都有出席。Lily接棒在即，當晚買咗多張枱請埋家人及老友們齊歡聚。佢丈夫都有出席，但保持神秘唔肯出鏡，實行做Lily背後嘅男人。支持Lily嘅仲有縱橫遊執行董事袁振寧（CN），做過博愛總理嘅CN話，打算明年重返博愛大家庭，拍住一眾好友齊做善事。講起旅遊市道，佢話今年港人到日本旅遊大約增加四十萬人次，但係廉航機位同樣大幅增長，所以生意都係唔易做。
卓妮