中環出更：陳恒鑌合照審慎避嫌
尋日係今年最後一個賽馬日，唔少名人都趁聖誕假期消費過後入沙田馬場碰吓運氣兼湊熱鬧。卓妮見到立法會議員陳恒鑌（Ben）同助理Fanny一齊入場，唔知係咪因為好友立法會議員何俊賢近日被人以匿名信投訴「包養」助理，阿Ben一見到記者即煞有介事強調呢位係佢助理，又拒絕同Fanny單獨合照，可能係費事瓜田李下喇！
不過阿Ben同Fanny一落到沙圈後，兩人就大方同人哋合照，似乎對相機又唔係咁抗拒，期間與仁濟醫院副主席王賢訊（Vincent）夫婦等人有講有笑，皆因Fanny同王賢訊太太朱穎詩（Vincci）就讀同一間中學，係師姐師妹，唔怪得特別啱傾喇！
朱穎詩期待產後遊星
Vincci腹大便便，佢話BB大約過多百幾日就會出世，預產期係明年四月。不過Vincent就搞笑反駁話唔止百幾日喎！今個聖誕假期因為Vincci要安心養胎，加上擔心有恐怖襲擊，所以冇去旅行，惟有等BB出世後，睇吓係咪去新加坡玩，因為Vincci曾經喺新加坡工作，非常喜歡當地美食。
同場仲有身形一次弗過一次的信興集團主席兼行政總裁蒙德揚（David），年尾又係跑季，熱愛跑步嘅David話，嚟緊會參加兩個馬拉松賽事。對於來年市道，佢就唔太樂觀，但若及早部署就可以減低損失。好似今年內地客減少，佢哋就採取居安思危政策，擴大本土生意，總之見步行步喇！
卓妮