今個聖誕暖笠笠，成為本港近幾十年來最溫暖嘅聖誕節。不過咁，唔少市民嘅感受啱啱相反，旅遊及零售業固然寒風凜凜，整體社會氣氛更加寒氣逼人，如果話今年係最令人「心寒」嘅聖誕節，相信好多人會贊同。
冇錯，凡係大時大節，市面例牌燈飾璀璨，氣氛熱鬧，可惜表面繁華掩蓋唔到種種隱憂。大家不妨回顧一下，過去一年香港究竟發生乜嘢事？遠嘅唔提，就講最近嘅版權修訂條例，已經搞到滿城風雨，政治爭拗無日無之，任何議題都上綱上線，港人想快樂都幾難。
面對咁嘅亂局，本港兩大宗教領袖不約而同呼籲大家以愛化解紛爭。天主教香港教區主教湯漢嘅聖誕賀詞係咁講嘅，經歷連串爭拗、矛盾同社會撕裂，家庭作為整體社會核心價值受到挑戰，希望大家趁住聖誕佳節陪屋企人。聖公會大主教鄺保羅嘅聖誕文告更指出，香港喺佔領運動以及政改爭拗後，已經變得撕裂分化，人與人之間缺乏互信包容，大家應該以愛同生命戰勝仇恨。
宗教領袖循循善誘，無疑用心良苦，弊在講者自講，亂者自亂，家陣社會愈來愈政治化，部分年輕人愈來愈偏激，根本唔會同你講道理。好似早前立法會門外嘅垃圾桶縱火爆炸案咁吖，涉案疑犯全部係年輕人，包括大專學生，佢哋受到「不守法絕不等同不尊重法治」嘅謬論洗腦，已經失去理性，郁吓就佔領，郁吓就圍堵，搞到永無寧日，社會點可能和諧，人與人之間又點可能互信包容吖。
好明顯，正因為政治爭拗不斷，經濟民生冇人關心，香港競爭力至會跌跌不休。尤其係旅遊及零售等相關行業，本來已經無以為繼，加上激進組織成日搞搞震，內地旅客更加望而卻步，今個聖誕訪港內地團較去年大減近三成，都咪話唔淒涼。早前有項調查顯示，唔少受訪市民表示今個聖誕會減少消費，過半人預計明年經濟狀況轉差。本報記者去旺角通菜街睇過，大部分商販都話今年市道差過舊年，估計生意額減少兩三成，有人甚至話今年係近三年來最差添。就以尋日開幕嘅冬日美食節嚟講吖，人流明顯較往年稀疏，當中雖然有宣傳不足等原因，但相信市道欠佳至係主要原因。
冇計喇，香港問題多多，內憂外患，都幾難有運行。最怕屋漏偏逢連夜雨，美國進入加息周期，內地經濟又面臨下行壓力，香港受到左右夾擊，樓市固然蓄勢欲跌，經濟前景更加一片暗淡。講到底，家和萬事興，家衰口不停，香港風雨不停，家嘈屋閉，呢個聖誕唔慌唔「快落」！