十一名沙田原居民早前因套丁被判串謀詐騙罪成，搞到一班鄉紳嬲爆爆。尋日鄉議局再度花大錢買報紙廣告，重申套丁唔應該刑事化嘅立場，仲話原居民非貪得無厭之輩。佢哋會與政府商討解決方法，若此路不通，可能會與政府對簿公堂，甚至尋求人大釋法喎！吓？「釋法」兩字好易觸動某些人神經，鄉議局主席劉業強呢鋪玩得咁大，唔知會唔會適得其反呢？
