區議會換屆選舉塵埃落定，其中一個突出現象係更新換代嘅呼聲甚高，連泛民具知名度嘅民主黨何俊仁及民協馮檢基，均雙雙落選收場，呢場更新換代風暴開始蔓延至建制泛民各大黨派，有傳白鴿黨副主席羅健熙有意放棄出戰俗稱「超級區議會」嘅區議會第二界別議席，專心博「升呢」做黨主席。
綜合多方消息指出，一旦現任黨主席劉慧卿於明年底唔再角逐連任，兩名黨副主席羅健熙與尹兆堅，以及黨總幹事林卓廷均有機會染指，惟觀乎三人中，以羅健熙接任主席嘅呼聲最高，事關林卓廷本身於黨內人緣就麻麻，「升呢」可能令黨內部分人士有反彈。
尹兆堅則因早前於區選落敗令其於黨內聲勢受挫，加上始終加入白鴿黨時間尚短，在天時地利方面都較為輸蝕。
羅健熙接受查詢時疑意有所指，好雀躍面對依家社會對世代交替嘅呼喚，外界估計佢想選主席亦「非常合理」，至於係咪選主席未有咁快作決定，一如當年佢選副主席都係臨時決定一樣。
對於係咪出戰超級議席嘅個人意願，佢承認，依家政治大環境要睇埋其他泛民，白鴿黨未必想出兩張名單出戰超級議席就可如願，依家繼續排隊係「畀黨多一個選擇」喎。