政情:做雙料校董 方文雄有排忙

政府尋日刊登憲報,公布多間大專院校嘅高層任命。中總常務會董方文雄分別獲委任為港大及科大校董,成為雙料校董, 同時獲再度委任為城大顧問委員會成員。大專學界近年風起雲湧,睇嚟方文雄喺未來幾年有排忙喇。

港大校委會主席續懸空

除方文雄之外,獲委任為港大校董嘅仲有陳衍里、陳南祿、孔桂儀及李維達,任期三年,由本月十二日起生效。資深銀行家陳子政及工業界立法會議員林大輝分別獲委任為理大校董會主席及副主席,任期三年,下月一日起生效。浸大校董會主席鄭恩基及副主席陳黃穗再度獲委任,任期分別係三年及一年,下月一日起生效。

唐家成則獲委任為大學教育資助委員會主席,陳鎮仁冧莊出任職業訓練局主席,前者任期三年,後者任期至一七年底。剛在區議會選舉中落敗嘅楊文銳獲委任為職訓局成員。至於懸空咗一段時間嘅港大校委會主席,則未見憲報公布任命。

第一手消息請下載on.cc東網iPhone/iPad/Android/Windows Phone Apps