中環出更：蔣麗芸「私有化」立會前管事

八十年代出道嘅立法會最資深管事羅秉義（Tony）今年初退休，終於唔使勞碌照顧議員喺議會內嘅飲食。不過前日立法會議員蔣麗芸（Ann）喺社交網站貼出一張落區相，竟然見到Tony同Ann一齊派單張及小福曆。原來Tony被Ann「私有化」，羅致佢做私人助理。

Tony過去近三十年喺立法會照顧議員飲食、幫忙傳紙仔，仲要呈交文件，未退休已有多名議員挖角，好似飲食界張宇人請他管理私房菜，新民黨葉劉淑儀亦力薦他做番飲食業。但係Tony唔想再做飲食，所以幾經思量，決定出任Ann嘅私人助理。

Ann就唔認將Tony「私有化」，而係將佢「公有化」，因為大眾都有機會畀佢服務咁話。Tony就大讚新工「薪高糧準」，時間彈性，滿足感仲大過以前，仲話如果Ann唔炒佢，想一路做落去添！

不過唔係個個議員助理都有Tony咁好待遇，我哋喺勞工處網站發現，唔少議員請助理出手都十分低，好似民主黨涂謹申僅出九千元月薪仲要求多多，包括要大專程度，超時或者假日工作，而工聯會屯門區議員陳文偉更只出八千至九千元，真係同人唔同命！

卓妮