聖誕臨近，四圍都見到聖誕老人嘅蹤影，其中一位比較特別，就係喺銅鑼灣鬧市高樓大廈扮蜘蛛俠，睇真啲，原來係環保組織嘅行為藝術，呼籲大家今個聖誕審慎消費喎。其實計功夫茶話齋，唔使人提醒，市民都會自動自覺買少啲，事關荷包乾塘，想大使都唔得喇。
呢嗱，有團體最近進行調查，發現超過兩成預計聖誕期間留港消費嘅受訪者將會比去年減少消費，而表示會增加消費嘅就只有一成六，表示會減少聖誕消費人數嘅比例，連續兩年高於整體增幅。最大鑊嘅係，超過一半受訪者認為今年經濟比舊年差，而認為出年經濟比今年更差嘅，更加接近三成。
其實唔使做調查，喺街上走一轉，都知市道有幾淡靜。尋日冬至，按照傳統唔少市民都會擦餐豪嘅，冬至大過年吖嘛，可惜今時唔同往日，有飲食業界人士話今年係回歸以來首次生意額下跌，情況仲慘烈過沙士同金融風暴；不少街市檔主亦呻到樹葉落，話生意差過舊年兩、三成，都咪話唔得人驚。
又難怪市民手緊嘅，僱主聯合會日前已經放風聲，包括旅遊及零售等行業對經濟前景感到悲觀，有中小企更講到明來年會凍薪，增聘人手嘅意欲亦減少。今時今日百物騰貴，除咗人工之外樣樣都加，咁嘅環境下，梗係留多兩個錢傍身穩陣啲喇！
話時話，旅遊同零售業形勢空前險峻，簡直係苦過弟弟。內地經濟前景不明朗，旅客消費模式轉變，港元持續走強，加上激進組織搞搞震，訪港旅客不斷縮水，以往聖誕新年檔期係「人搵房」，家陣就變咗「房搵人」，聖誕節假期間訂房未爆滿之餘，以往踏入十二月，客人已經要訂定農曆新年住房，今年就到依家都未見影。正所謂唇亡齒寒，旅遊業唔掂，零售業都唔慌有運行。最近有化妝品連鎖集團同珠寶店公布業績，盈利下跌超過四成，再睇吓旺角銅鑼灣等旺區，四圍都係吉舖，早排業主仲諗住睇定啲先，企硬唔肯減租，家陣見勢色唔對，都要向現實低頭，有啲甚至唔理好醜，但求甩手，短期租約都照殺添。
咁都未算吖，美國啱啱宣布加息，雖然香港暫時未跟隨，但係樓市已即時有反應。有豪宅劈價千萬元，亦有老牌屋苑細單位減價百萬元。最慘係危機殺到埋身，港產財金官僚仲係老神在在，話美國加息並無引發骨牌效應，你話死唔死吖。
唔使求車公靈籤，未來一段日子，香港人肯定有排捱。今年聖誕應節金曲，睇怕都係「又到聖誕，又到聖誕，下個聖誕有冇今年咁歎」咯！