立法會原訂月初恢復二讀俗稱「網絡廿三條」嘅《二○一四年版權（修訂）條例草案》，但因法定人數不足而流會，有人歸咎商務及經濟發展局局長蘇錦樑箍票不力，亦有建制派議員表明拒絕編更留守開會防止流會。其後草案雖然恢復二讀，但遇上泛民主派不斷要求點算法定人數，有多次差啲因為開會人數不足而流會。有消息指出，原來建制派編更制已經壽終正寢。
其實編更制曾經算行之有效，確保立法會每個時段都有足夠法定人數，可以喺響鐘五分鐘內返回會議廳，以防止流會，但點解又會壽終正寢呢？
有建制派人士講過，佢哋困喺會議廳開會，但泛民議員就「飲咖啡溝女」，並不公平。亦有消息透露，建制派本身都無心戀戰，覺得點解永遠都係佢哋留守，久而久之亦令編更制消失，難怪無論草案二讀前流會或之後嘅會議，建制派都人數不足。
正因為部分建制派議員唔肯留守議會，泛民經常以建制派齊人就唔會流會為由，據聞令建制派相當困擾，唔識點樣招架之餘，亦擔心市民會將流會責任放喺佢哋身上。
事實上，做得建制派就要「食得鹹魚抵得渴」，冇編更制下，即使長時間留守議會亦冇計。