政情：陳曼琪退「黨」 勢選立會
政界中人擁有政黨身份係雙刃劍，於直選時有政黨機器支援，但對專業界別則可能係包袱。最新決定去政黨化嘅政界中人，係去年佔領行動（佔中）期間代表潮聯小巴申請禁制令嘅律師陳曼琪，佢宣布明年一月退出已加入十五年嘅民建聯。有傳佢去政黨化係計劃出戰明年立法會法律界功能界別議席，打破泛民主派壟斷法律界議席嘅局面。陳曼琪就表明「政治一日都嫌長」，永不說不！
○三年開始任黃大仙區議員嘅陳曼琪，前晚突然於黨中委會會議口頭交代退黨決定，她尋日發表聲明證實退黨一事，原因之一係身為香港中小型律師行協會（協會）創會會長，於發展協會有不可推卸責任，表明一六年開始會以獨立身份服務地區、法律界及社會。
盼企得更前 打破壟斷
陳曼琪接受查詢時進一步透露退黨嘅肇因疑與佔中有關，指包括佢在內嘅每個人於佔中都有體會，當時亦走在反佔中最前線，冀未來企得更前回饋社會。佢其後疑意有所指，多次提及協會係同時為事務律師、大律師提供一站式服務嘅平台，歡迎不同政黨嘅律師加入，而佢嘅終極希望係成為代表「香港人嘅律師」。
綜合政圈多方消息指，陳曼琪今次去政黨化專注協會事務，疑劍指法律界功能界別議席，因為法律界一向由泛民主導，連逾百年歷史嘅律師會亦被指「淪陷」，去年首次以大比數將當時會長林新強罷免。資料顯示，陳曼琪於一二年已另起爐灶成立協會，今次更打正旗號，不惜退黨都要瞓身以協會工作為先，明顯係選定跑道博「升呢」。
關注濫用覆核或可突圍
不過，陳曼琪嘅民建聯成員身份為人熟悉，係咪退黨就可以「洗底」，並於泛民嘅法律界橋頭堡取得零嘅突破，暫時行情仍係被人看淡。有分析指，陳曼琪如要突圍而出，除咗高舉反佔中旗幟，喚醒業界捍衞法治嘅核心價值外，仲可以關注濫用司法覆核情況，或者係可行嘅出路。