中環出更：傳退火線 卿姐又賣關子
立法會選舉仲有九個月就舉行，一直有傳民主黨（白鴿黨）立法會議員劉慧卿將會退位讓賢，由總幹事林卓廷代為出戰新界東直選。卿姐尋日舉行傳媒茶敍時再次賣關子，話聖誕節之前要保持神秘，拒絕透露會否參選，問到依家係咪有世代之爭，佢又反問記者：「係唔係好想我唔選先？」
卿姐尋日心情大好，大派聖誕禮物，佢話已經成功爭取黨友支持喺明年三月前舉行辯論初選，就全港五大選區以及超級區議會界別，各舉行兩場論壇，讓有意出選嘅黨友公開辯論，預計每場開支要十萬元經費。佢又話，論壇完結後會有網上投票，但網上投票並不影響該黨甄選立法會參選人的機制。
擺譚耀宗劉皇發上枱
問到會否參與論壇，卿姐指如果參選就會以身作則，依家仲考慮緊參唔參選，將會考慮黨內支持及自己喺議會嘅年資再決定。不過，卿姐透露除咗民建聯譚耀宗及經民聯劉皇發之外，佢嘅議員年資係最深，已經做咗廿幾年。其實譚耀宗同劉皇發都曾經公開表明有意退下火線，唔知卿姐特別提及兩人，係咪意有所指呢？
卓妮