「本來無一物，何處惹塵埃」，呢句佛偈充滿禪機，考起唔少人。其實都唔係咁複雜啫，簡單啲講，即係話一個人冇貪念就唔會惹是非，相反如果心術不正，咁就唔止惹塵埃喇。
好似嗰班反對派政客咁吖，收取壹淫媒前主席淫賤黎秘密捐款而冇申報，醜聞曝光後唔止唔認錯，仲要百般狡辯，而且互相包庇，咪就係心術不正囉。尤其係李卓人及梁國雄，簡直醜態百出，立法會議員個人利益監察委員會話就話立案調查，結果做騷咁做，即使兩人口供矛盾，疑點重重，依然獲得放生，你話係咪匪夷所思吖。正如「東方報業民意調查」顯示，大部分受訪者認為立法會調查只係一場鬧劇，反對派政客包庇護短，放生自己人，開咗「袋住先」極壞先例。
所以話，公道自在人心。李卓人收受淫賤黎最少一百五十萬元秘密捐款，其中五十萬元「袋住先」長達八個幾月，雖然醜聞曝光後交番畀工黨，但期間嘅利息收益就袋袋平安，難為佢仲死撐只係「好少嘅數」、「無關痛癢」喎。而梁國雄更加蠱惑，居然將秘密捐款拆細存入唔同戶口，有偽造文件之嫌，簡直係無法無天。
正如網民話齋，有隧道公司職員執一元「袋住先」，金額仲少喇，結果咪一樣惹上官非。李卓人涉嫌私吞利息遠遠唔止一元，如果話咁都「無關痛癢」，乜嘢至有關呢？
最離譜嘅係，淫賤黎鬼拍後尾枕自爆一直定期向工黨捐款，點知李卓人居然死口唔認，兩人口供矛盾，愈描愈黑，如果話當中冇不可告人嘅秘密，細路仔都唔信喇。市民眼睛係雪亮嘅，大部分受訪者認為李卓人明顯涉及個人利益，解釋完全冇說服力，難以釋除公眾疑慮。
冇錯嘞，議監會中一半委員係反對派自己人，佢哋同李卓人及梁國雄根本係一丘之貉，放生又有乜出奇吖。正如有人話齋，反對派政客冇嘢叻，最叻就係雙重標準，有口話人，冇口話自己，政府官員一有行差踏錯，反對派政客一定死咬唔放，喊打喊殺，而輪到自己身有屎，就互相包庇，狼狽為奸，呢啲咪就係臭罌出臭草囉。
講到底，旨意立法會自己人查自己人，等於與虎謀皮，盞嘥氣嘅咋。上述調查顯示，大部分受訪者認為黑金醜聞疑點重重，追查真相一定要靠廉政公署依法辦事。話時話，醜聞曝光已超過一年，廉署究竟查成點呢？幾時至有結果呢？嗱，咪話功夫茶唔提醒，家陣香港已經夠晒烏煙瘴氣，廉署千祈唔好又姑息養奸，不了了之吖！