扶貧委員會明日將公布退休保障計劃嘅諮詢文件，香港大學教授周永新早前提出六十五歲以上長者每月可獲三千元嘅方案，被指會大幅增加政府財政負擔而行唔通。眼見政府諸多推搪，周永新尋日主動降低要求，建議將領取養老金嘅年齡與港人平均壽命掛鈎，並將領取年期定為十三年。以現時八十三歲平均壽命計，即長者七十歲開始領取養老金。周永新批評政府嘅思維十年如一日，只會製造問題而唔係解決問題，仲話已準備開人生第一個記者會回應退保諮詢文件，唔知勞工及福利局局長張建宗點樣接招呢？
