政情：鄭文聰練跑 提「高」警覺
食物及衞生局局長高永文早前跑步跌倒，搞到骨裂又要縫針，呢宗意外不免令人關注運動安全。最近愛上長跑嘅香港工業總會主席鄭文聰（Daniel）就被嚇親，大嘆操練時會特別小心，切忌操之過急。
Daniel近幾個月開始練長跑，由跑咗幾年十公里長跑嘅女兒負責訓練，目標係同女兒一齊比賽。雖然係咁，但Daniel就表示唔會操之過急，每星期只練習兩至三日當運動。見到高永文出事，Daniel就話好彩未試過因運動受傷，但以後會提醒自己小心啲。
叫港生放眼大陸市場
除咗練跑，Daniel早前帶學生參觀內地廠房，好似睇吓點樣運送零下廿幾度嘅朱古力到唔同城市。Daniel希望未來可以多邀請學生參加內地活動，因為香港市場太細，唔能夠只將目光放喺本地市場，要放眼大陸市場至啱。