政情：譚姜美珠帶隊遊台 助耆團聚
城中有唔少慈善團體幫人實現願望，有時長者嘅願望簡單到令人難以置信。早前博愛醫院獲贊助包機請長者到台北玩，博愛主席譚姜美珠（Winnie）即刻請轄下社會服務機構幾十位長者一齊去一日遊。Winnie話，團友之中有一位盲人長者，佢嘅願望就係想感受吓坐飛機嘅滋味。
有婆婆與姊分隔兩地逾30年
早幾日Winnie出席一個為博愛籌款嘅晚宴，同場仲有博愛醫院永遠顧問湯修齊（Henry）及總理蕭何元鳳。Winnie話今次行程令佢好感慨，因為見到好多感人故事。最令佢動容嘅係有位婆婆約見住喺台灣嘅家姐，原來兩人已經分隔三十幾年。
Henry見Winnie咁上心幫長者圓夢，直言好開心，因為佢喺博愛主席任內推出「長者夢想成真」計劃，知道好多長者嘅願望其實唔算高，呼籲各界應該多啲關注長者。