政情：公文袋「被網民牽鼻走」
立法會上星期四恢復二讀《版權條例草案》，喺公民黨 （公文袋）陳家洛、毛孟靜以及其他激進泛民不斷點人數下，審議進度緩慢。作為其中一個拉布黑手嘅公文袋，尋日被踢爆對於《版權條例草案》嘅立場不斷改變，更加有人批評佢哋不分青紅皂白，被網民牽着鼻子走添！
政府按條件讓步
事源政府曾經喺二○一一年前將草案提交立法會進行二讀，時任公文袋立法會議員陳淑莊就提出修正案，要求政府豁免惡搞、戲仿等二次創作不屬侵權，作為支持草案嘅條件。當時政府未有作出任何讓步，草案最後亦因為網民激烈反對而暫時撤回。
時至今日，政府再次向立法會提交《版權條例草案》，草案經過三年諮詢後已經得到唔少改善，而當年陳淑莊提出豁免惡搞、戲仿等條件，亦包含咗喺政府提出嘅修訂入面。明明政府已經讓步，公文袋卻仍然反對。有人就批評佢哋受到網民影響，不分青紅皂白反對，因為一、兩點政治爭拗而癱瘓成個議會嘅功能。
郭榮鏗死撐唔認
公文袋《版權條例草案》草案委員會成員郭榮鏗（Dennis）就否認有關指控，佢話，網絡世界日新月異，喺過去一年半草案委員會嘅審議過程中發現，泛民三個修正案，包括豁免個人用戶衍生內容（User-generated content, UGC）、引入「公平使用」概念，同埋「禁止合約加入凌駕條文」，都係保障網民喺使用網絡時有更大自由，亦令資訊科技有更好發展，泛民同公文袋一直以來都係以呢個方向討論，並唔係因為網民講佢哋先至跟住講。
泛民議員被指喺《版權條例草案》轉軚都唔係第一次，因為泛民拉布而迫長期鎮守立法會嘅商務及經濟發展局局長蘇錦樑上星期就踢爆，資訊科技界議員莫乃光突然「轉軚」，由支持草案變成反對，仲公開要求莫乃光交代。唔知泛民有冇諗過，呢場《版權條例草案》戰爭係明年立法會選舉前哨戰，只要泛民繼續拉布，針對佢哋嘅攻擊只會有增無減，反正政府早已數夠票支持，到時泛民醜事被揭，草案又成功通過，今次拉布豈不是「賠了夫人又折兵」？