中環出更：公記啃「老」慘敗 潘國山孭鑊
老牌建制派組織公民力量（公記）喺區議會選舉中大敗，新界東連失五席，而且全部都係資深老將。據悉，選舉前公記內部已經有年輕化呼聲，奈何搵唔到人接班而要「食老本」。聽聞選戰慘敗後，公記主席潘國山已經認衰，表明改選後將唔再做主席，以承擔責任。
上屆區選響警號
公記於二○一一年區議會選舉時亦有資深區議員敗選，當時已響起「年輕化」嘅警號，不過直至啱啱過去嘅選舉仍未找到合適人選接班，只能由老將「頂硬上」，最後導致大敗。據聞公記事後檢討慘敗原因，認為同服務落後於形勢、宣傳產品單一及傳統不無關係。至於年輕化，目前已有部分議員助理表示有興趣參選，但人數不太多，公記內部仍然計緊數，未決定呢班年輕人到底接任現有議席，定係收復失咗去嘅議席。
另外，西九新動力總幹事陳文彥喺區議會選舉前約一星期辭職，尚有數日就會正式離職。主席梁美芬指，陳文彥離職純粹係因為僱傭合約完結，並非與選舉有關。咁啱西九新動力喺選舉中亦失去多個議席，唔通兩件事真係巧合？
卓妮