中環出更：明星飯堂 重新開餐
早前因捱唔起貴租而結業嘅明星飯堂新樂酒樓，上個月改名為新新酒樓重新開張，唔少名人都去送上祝賀。翠華餐廳主席李遠康都現身撐酒樓股東之一嘅天寶鐘表主席梁青華（華哥）。城中飲宴應酬多，想食得健康都唔容易，李遠康就分享佢嘅早餐餐單，包括滾水煮麥皮、白灼八條秋葵加埋一杯酵素。一早打好個底，返工後就可以盡情飲奶茶、食奶油豬喇！
李遠康話，咁食嘅目的係清腸胃，其中秋葵好處多多，有豐富鈣質亦可保護個胃。佢原本要食胃藥，但係食咗大半年秋葵後，胃藥都唔使再食，腰圍亦細咗好多。食完健康早餐後，佢會再帶個蘋果或香蕉返公司，得閒亦會游吓水、做運動，咁樣食應酬飯就唔使就住喇！
香港女童軍總會香港總監李周美枝及副總監佘徐瑞蘭、香港鐘表業總會永遠名譽會長孫秉樞、寶齊萊亞太區行政總裁曾國雄等業界名人都有到賀。李周美枝話，早前佢同身兼交通安全隊副總監嘅華哥一齊參加上海國情班，大家都係制服團體一員分外投契。
沿用舊班底 人情味猶在
酒樓東主莫大任見到賓客滿座，開心到合不攏嘴。佢話最難得係一班舊伙記打住散工等佢重開，所以新酒樓多數係舊班底，尤其係廚房出品部，咁就可以確保食物嘅味道不變喇！華哥就話，新樂酒樓原本係佢喺九龍嘅飯堂，新樂結業近八個月期間，佢要周圍走搵食，依家搵到合適地方重開，梗係開心到極，仲準備嚟緊過年嘅開年飯就喺呢度食喇！
卓妮