中環出更：廚餘變佳餚 極「富」創意
善用廚餘大家都識講，不過除咗用隔夜餸嚟炒飯，仲可以有咩好「煮」意呢？早幾日卓妮喺工展會見到名廚鄭錦富、藍帶名廚琳琳等人，於齊惜福舉辦的名人烹飪表演中大展身手，教市民點樣利用「盛」食烹調成新菜式，齊惜福一班成員試食後都大讚好味。
唔少家庭平日煲湯都會剩低一大堆湯渣，琳琳就教大家用湯渣入面嘅豬肉，加啲煎香咗嘅蒜、乾葱及橄欖油，再逐步加入蛋黃醬一齊攪拌，配以鹽及胡椒粉調味，然後放於多士上，瞬間成為法式聖誕派對小食。齊惜福之友榮譽委員吳蕙英及委員廖宇軒好感興趣，齊齊詢問烹調方法。
羅台秦招牌八寶鴨饗客
開法國餐廳嘅香港中華廠商聯合會（廠商會）常務會董黃家和亦有出席，佢話佢間餐廳最常見嘅廚餘之一係蘿蔔頭，棄之可惜，不過用嚟煲湯好香o架。咦！咁啲食材煲完湯，湯渣又可以再用，諗落認真抵食。
同場嘅廠商會副會長戴澤良及太太羅台秦（Louisa）亦有惜食及環保貼士，當年因讀書及工作在外國居住過十幾年嘅Louisa話，一個人住的時候，如果唔想煮得太多而經常要食隔夜飯，可以選擇煮西餐，例如意粉，因為相比起中餐，一人分量的西餐材料更方便預備。有時周末請埋朋友一齊聚餐，佢就會煮佢嘅招牌菜八寶鴨。
鄭錦富就教大家用菜葉同雞肉切碎撈勻煎成菜葉雞蓉餅，齊惜福之友榮譽委員區海倫及委員王詩雅好欣賞，話用料及做法夠晒平民，好實用。
卓妮