世界上有好多嘢好難返轉頭，除咗潑出去嘅水、嫁出去嘅女同埋暴飲暴食增加嘅體重，仲有就係永遠加快減慢嘅油價。如果唔係，公共交通加票價，就唔會次次都搵油魔肆虐做藉口喇！
由多個運輸業團體組成嘅「陸路交通運輸業大聯盟」，趁住尋日《競爭條例》全面生效，拉大隊去競爭事務委員會辦公室請願，話要投訴油魔搶錢，打壓業界喎。據佢哋所講，國際油價已經由高峰期嘅一百多美元，跌到落家陣三十幾美元水平，下調幅度接近七十個巴仙，反觀本港油價仍然居高不下，同期柴油價格只係由高位下調兩成左右。
咁都未算吖，業界引用統計處過去五年數字，指本港五間油公司一共調整汽油價格三百八十次，當中約二百次出現兩間或以上油公司喺時間、幅度同價格完全相同，有九次更加係五間油公司「共同進退」，而柴油價格調整嘅情況亦係差唔多，顯示油公司調整價格嘅行為模式高度一致，懷疑有人違反《競爭條例》喎。
講真，油價加快減慢，油公司被指合謀定價，呢啲都唔係咩新聞咯。幾年前運輸業界曾經發起「餓死油魔」行動，輪流杯葛某間油公司，可惜效果麻麻，油魔唔單止冇餓死，反而愈養愈肥，本港油價由幾年前嘅全球第四貴升至依家全球最貴，真係唔到你唔服。冇計喇，人哋財雄勢大，加上港府闊佬懶理，業界又點夠人鬥吖。
所以話啫，要解決油公司食水深嘅問題，民間自發行動係唔夠嘅，點都要靠政府出手。查實消委會之前曾建議政府調查油公司成本結構合唔合理，以及有冇合謀定價，可惜你有你講，官僚睬你都傻，佢哋最叻就係攞「大市場，小政府」做擋箭牌，翹埋雙手關人個關，再唔係就喺網上公布油價資料，等車主自行決定去邊度入油，姿勢大過實際。好嘞，家陣有咗《競爭條例》，官老爺再冇藉口龜縮，到底法例係嚟真抑或係冇牙老虎，市民金睛火眼（目及）到實o架！
話時話，香港表面係自由市場，崇尚競爭，實際上霸權壟斷無處不在。好似某啲行業設有商會，劃一釐定會員嘅售價，自行定價嘅會遭到懲罰，競爭法管唔管呢啲行為？仲有，即使打破劃一定價，又會唔會有人「恃大隻」以本傷人，實行割喉式競爭，搞到小商戶冇啖好食，未見其利先見其弊？
始終都係嗰句，法例係死嘅，人係生嘅，制度原意再好，執行不得其法始終都係嘥氣。最怕官僚應做嘅唔做，唔應做嘅亂做，到時盞添煩添亂，弄巧成拙嘅咋！