「香港」睇怕要改名為「臭港」了！皆因近期除了發生立法會「便便事件」，搞到啲尊貴議員心慌慌怕見月光，事關名牌衣褲沾到疑似糞便事小，議員批評立法會保安明顯有嚴重漏洞，今次沾了一褲都係，下次若然有人放炸彈，咁點算啊？
有論者從公眾角度，指立法會由一個政策議事堂，變成示威表演場，再墮落為糞便地雷陣，固然是一種持續不斷的倒退，這大有道理，立法會在多數市民心目中早已淪為「垃圾會」久矣，拉布、流會、擲嘢、小學雞點人數……烏煙瘴氣，如今再發生「便便事件」，進一步臭氣熏天，亦可謂實至名歸矣！
議事堂「臭屎密冚」失敗，接踵而來嘅係城門河「色變」，大量死魚漂浮，搞到大圍近文禮閣河面臭氣濃烈！阿哥，「河降死魚」肯定唔「老利」啦，以前有所謂「天降祥瑞」，所降之物多是麟、鳳、龜、龍、白雀、甘露、靈芝、連理之木……未聞有「死魚」者也！
如今香港卻是妖氣沖天，反中亂港有運行，早已淪為「妖獸都市」！妖由人興，一眾佔領的幕後黑手，至今依然逍遙法外，有寸嘴者甚至「自己感到慚愧」，試問懲妖斬黑手一日一日在拖延，香港有乜辦法唔死魚圍河，香港變臭港！妖霧重來，香港怎會睇到出路！
政府近排嘅大型基建更是多災多難，港珠澳大橋、高鐵、沙中線……工程又超支又延誤，政府嘅問責高官扭盡六壬，只求向立法會申請追加撥款，可是單是高鐵的「一地兩檢」都搞到好似落雨天打麥──難收場，睇見都好笑！
至於「民生無小事」，更是令人唏噓，公屋上樓拖到七年，經濟前景不樂觀，衣食住行樣樣難，死魚圍河，敢問天會降祥瑞嗎？