立法會上周六發生駭人聽聞的枱底藏糞案，搞到會計界議員梁繼昌一褲都係。立法會主席曾鈺成尋日表示，案中主要「證物」嘅化驗結果，仲要等多一、兩日先有，而由於秘書處職員實在太過盡責，迅速將肇事枱底清潔乾淨，變相毀滅咗案件嘅另一部分證據。佢又話，翻查閉路電視影像後，睇唔到最近有任何可疑人物入過嗰間房，笑言就算搵個「大偵探」嚟，都未必查到事件真相。唔通真係好似飲食界張宇人所講，係梁繼昌自己中咗地雷，帶咗啲證物入立法會而不自知？
