政情：性小眾諮詢 傾兩年得個吉
勞工界代表因不滿政府同資方拒就標準工時立法，喺上月嘅標準工時委員會會議集體拉隊離場，負責討論性傾向歧視等問題嘅消除歧視性小眾諮詢小組，亦出現類似場面。會內代表性小眾嘅委員，因不滿保守派委員拒就消除性傾向歧視立法，喺尋日小組最後一次會議離場抗議。
小組委員離場抗議
諮詢小組喺一三年成立，任期至本月底，最近開始就小組嘅結論報告「埋尾」。代表性小眾嘅委員，認為佢哋大多數嘅意見都不獲接納，對於立法問題政府同保守派更係一直拖延，只肯喺報告內承諾「進一步研究」，於是就決定喺昨午嘅會議拉隊離場，並表明唔會簽名確認報告。
其實以立法會議員梁美芬為首嘅保守派委員，亦對報告內容有唔少不滿，早已計劃另行發表小眾報告表達佢哋嘅意見。依家性小眾一方帶隊拉倒討論，保守派亦會有樣學樣，考慮唔簽署報告，即係近兩年嘅討論最後又係得個吉！未能拉近雙方嘅根本性分歧。