現屆立法會任期將於明年七月結束，意味議員只得番幾個月浪費公帑，大家自然要加把勁喇！繼發展事務委員會決定喺明年三月出訪新加坡，向來較少外訪嘅保安事務委員會，亦打算喺差不多同一時間出訪澳洲，聲稱要考察當地嘅酷刑聲請機制喎。
今次公費外訪團玩足七日六夜，坐經濟客位都要二萬三千幾蚊一個人，坐頭等就更加要成六萬銀，行程包括造訪澳洲紅十字會、人權委員會、聯合國難民事務高級專員辦事處，以及參觀當地嘅戒毒康復同懲教設施等。
眾所周知，保安事務委員會主席葉國謙下年收山唔選，其他委員有幾多可以成功連任，依家亦冇人講得準，如果佢哋豪花幾萬元公帑外訪後，隔幾個月就落選咗，咪嘥晒啲考察成果？公眾除咗質疑香港嘅酷刑聲請機制被濫用之外，係咪都要關注吓我哋班尊貴議員嘅燒錢行為呢？