政情：林鄭官到無求 評分創新低
特區政府表現無能，施政失誤同政策爭議可謂一波未平、一波又起，由鉛水事件、TSA爭議、以至最近嘅版權法風波，真係沒完沒了，一鑊大過一鑊。最新一項民調顯示，未計剛上任嘅創新及科技局局長楊偉雄，三司十二局主要官員有多達三分之二、即十人評分下跌。其中三名司長更係全線報跌，外號「好打得」嘅政務司司長林鄭月娥，評分更跌至上任後新低。至於外號「吳得掂」嘅教育局局長吳克儉，評分就繼續包尾，但由於有「奶媽」之稱嘅林鄭本身亦好唔得掂，今次想分身救佢都幾難！
表現差劣仍未知驚
香港研究協會喺本月七至十二日，成功抽樣訪問咗約一千一百名市民，叫佢哋就三司十二局主要官員嘅表現進行評分，一分為非常不滿意，五分為非常滿意。結果顯示，林鄭嘅評分再度急挫，由十月嘅二點九一分，大跌零點一三分至本月嘅二點七八分，係佢自一二年上任以來嘅新低。另外兩名司長財政司司長曾俊華同律政司司長袁國強亦唔好得好多，評分同樣下挫，分別有三點二九分同二點四八分。
其實市民對林鄭嘅表現不滿早有先兆，早喺今年四至六月政改爭議期間，佢嘅評分已跌至只得二點八二分，低於三分嘅合格水平。不過，林鄭似乎仍意識不到警號，喺鉛水醜聞中公然護短，包括喺立法會辯論特權法查鉛水動議時，反轟議員要求官員當眾飲鉛水係「屈辱」，並自言「官到無求膽自大」，話唔怕畀人鬧喎，結果變成「官到無能分自低」。
最近多名新界原居民因「套丁」行為被判囚，林鄭亦被翻舊帳，指佢出任發展局局長時曾去信鄉議局，表明私下轉讓丁權唔會被刑事檢控，有誤導原居民之嫌。
高永文民望都「仆親」
局長方面，唔計楊偉雄嘅十二人有七人評分下跌，一人無起跌，上升嘅只得四人。當中以早前不慎仆親嘅食物及衞生局局長高永文跌得最多，但由於佢本身民望高，跌極都係最高民望嘅局長。反觀吳得掂雖然今次僅微跌零點零一分至二點零七分，但始終都係包尾。如果TSA風波遲遲未能擺平，相信佢嘅評分好快就會再次跌破兩分，貼近非常不滿意嘅水平。