中環出更：楊偉雄搵副手 唔要「欽點」
創新及科技局成立近一個月，局長楊偉雄甫履新即列舉九大工作重點，其後又自稱差不多廿四小時工作，外界都關注有無副手可以分擔楊偉雄嘅工作，楊偉雄預告，副局長及政治助理人選正在「跑程序」，預料於一、兩周內完成。
立法會多個事務委員會尋日舉行聯席會議，楊偉雄回答議員提問時透露，副局及政助均由自己挑選，唔係特首梁振英揀畀佢，而且已經得到特首同意，依家正在「跑程序」，即係要查吓人選嘅背景，形容呢啲都係一啲政府必要嘅程序，預計於一、兩周內就會完成。
其實依家距離二○一五年結束仍有半個月，唔知會否趕及年底公布，等踏入一六年就可以齊上齊落，分工合作去跟進九大工作重點呢？
手機忽響 口水解決
另外，今次聯席會議仲出現一段小插曲，話說會議開到最後差不多尾聲，楊偉雄嘅手機突然響起，佢第一時間講對不起（Sorry），手忙腳亂未成功關閉鈴聲之際，靈機一觸用右手手指點口水，再觸碰手機螢光幕，此時幸好喺其身邊嘅創科局常任秘書長卓永興即刻接波答問題頂住先，咁先令到個場面無咁尷尬。
卓妮