政情：麥美娟爸爸借囡智退電騙
電話騙案猖獗，唔少市民都收過來自「中聯辦」嘅疑似詐騙來電，稍一不慎就好容易誤墮陷阱。其實只要多啲留意新聞，就可以識破騙徒嘅詭計，好似立法會議員麥美娟（Alice）爸爸咁，早前收到自稱「中聯辦」嘅來電叫佢收取包裹，不過Alice爸爸霸氣回應對方：「我會叫個女問張曉明（中聯辦主任）拎o架喇」，相信騙徒聽到無癮之餘，都會覺得出乎意料之外。
點解Alice爸爸咁醒目呢？Alice笑笑口話，父親平日好關心時事，每朝早都會去圖書館睇四份報紙，自然對咁經典嘅騙局提高警覺喇！
Alice事忙 留港過聖誕
Alice仲話佢爸爸嘅生活好寫意，得閒就睇實財經台，留意股市上落，仲會返屋企幫手湊孫。不過Alice就好忙，要兼顧地區事務及立法會工作，今個聖誕節都抽唔到時間外遊，只好留港過節喇。