中環出更：血「管」有方 張雲正食得健康
為期廿四日嘅工展會尋日開鑼，除咗吸引好多市民搶平貨，唔少高官都趁機掃貨。卓妮見公務員事務局局長張雲正（Clement）及新聞秘書趙慧儀（Teresa）喺賣健康產品攤位內仔細研究，Clement仲好熟練咁幫Teresa介紹各類產品，原來佢有遺傳性高血壓，所以一向好注重養生，難怪對健康產品咁有心得喇！
Clement話，佢有家族遺傳血管硬化而導致血壓高，不過平時有做運動習慣，所以情況唔算嚴重，食藥劑量亦唔多。為咗預防做運動時血管過度擴張，所以佢會食健康產品，自然對各種產品好熟悉喇。Clement又自爆，每次轉工都會因壓力而減磅，今次升任局長未夠半年已經瘦咗七磅喎！
李秀恒睇好入場人次升
食物及衞生局署理局長陳肇始同常秘謝凌潔貞都有入場，兩位女士仲一支箭咁走去睇廚具，唔知係咪想買新廚具預備聖誕大餐？商務及經濟發展局局長蘇錦樑亦都好快趣就買咗個首飾盒，話要送畀太太，又買咗即食麵及蝦子麵，話佢好鍾意食喎。
主辦機構中華廠商會聯合會（廠商會）會長李秀恒話，今年雖然經濟麻麻，但市民精打細算，加埋工展會嘅優惠多，相信今屆入場人次會增長一成。
廠商會副會長兼展覽服務公司主席戴澤良就話，早前廠商會已捐款畀非牟利組織喺場內設攤位，推廣點樣將廚餘轉化為有用物質，展覽期間仲邀請到名廚即場示範用剩食烹調，希望為環保盡一分心力。
卓妮