立法會工務小組委員會尋日討論港珠澳大橋香港口岸填海及口岸設施工程嘅撥款申請，面對立法會終日「拉布」，運輸及房屋局副局長邱誠武（邱副）可能都知道要如期通過撥款實在唔容易。邱副就喺會上疑似用廁所「威脅」拉布議員，話如果攞唔到撥款，口岸就會冇錢興建停車場、的士輪候區，以及供司機使用嘅公廁，雖然呢啲設施唔會影響大橋通車，但都唔理想喎。莫非邱副經歷過○八年的士司機堵塞交通一役，以此提醒議員，的士大佬唔可以得罪呢？
