政情：羅台秦手袋失竊留陰影
近期電話騙案嚴重，政商界名人紛紛中招，日前更有富婆唔見身份證，搞到銀行戶口被盜取八百多萬元，事件令人嘩然，更令中華廠商聯合會會董羅台秦（Louisa）勾起手袋被盜竊嘅往事。Louisa透露，曾經喺北京公幹時被偷手袋，搞到證件、電話等全部無晒，雖然最終都可以返港，但返港後仲要花成個月時間不停補領證件，佢直言諗起都驚吖！呢件事就令佢留下陰影，初期手袋一離身就非常不安，要五年時間先有好轉。
肥張聲東擊西舉報騙案
講開騙案，金融服務界立法會議員張華峰（肥張）日前自爆被假扮嘅全國政協委員黃楚標騙取九萬元，事件揚開之後，原本肥張話前日朝早會到警署報案，但點知佢臨時甩底，兼夾音信全無。
原來肥張施展調虎離山之計，低調去第二個警署報咗案，直至尋日中午先喺社交網站留言話：「多謝傳媒朋友關心本人的遭遇，但我不想大家就此再胡亂揣測。作為一位奉公守法的巿民，我昨（8日）已跟警方落了口供，相信警方會努力跟進案件，查個水落石出，把歹徒繩之於法。」既然肥張唔想大家胡亂揣測，咁就唔好透露幾時去報案啦，講咗又唔現身，累記者白等數小時。