政情：發言被窒 林健鋒疑開咪爆粗
立法會尋日又發生議員疑似「爆粗」事件，不過今次並非來自經常爆粗嘅泛民主派「拉布」四人組，亦唔係講過「肯×定有問題」嘅民建聯鍾樹根，而是身兼行政會議成員、香港總商會代表及經民聯副主席嘅商界（一）議員林健鋒（Jeffrey）！
事緣尋日立法會中午因法定人數不足而流會前夕，會議正在處理議員提出嘅六條口頭質詢期間，立法會主席曾鈺成叫Jeffrey提出跟進問題，Jeffrey隨即將收音咪掛在心口，準備站起來發言。此時人民力量議員「慢必」陳志全要求響鐘點算法定人數，Jeffrey當堂被打窒咗。
被截住發言嘅Jeffrey一邊用手將咪脫下，一邊疑似講了「冚家」兩個字，估計係佢一時氣憤衝口而出，但就甩轆唔記得熄咪，結果將心嗰句抒發咗出嚟，但相信佢並非有心公開爆粗教壞細路。Jeffrey尋晚回覆話：「人無完人，我都是性情中人」，即係間接承認有爆粗囉！