政情：「之」持港科院 揼心口撲捐款
近期香港突然好「科技」，創新及科技局成立後，由香港大學前校長徐立之做創院院長嘅港科院亦隨之成立，霎時間，一直喺實驗室做研究嘅科學家備受重視。不過政府只係以配對基金形式支持港科院，若想有充足水源，仍需企業家支持，而搵「水源」嘅重任就落在徐立之身上。
盼增年輕人科研興趣
徐立之近日成功搵到中華總商會永遠名譽會長蔡冠深（Jonathan）捐一千萬元支持港科院。Jonathan話佢擔任中國科學院顧問廿幾年，一直支持科技，所以當徐立之搵佢幫手時即爽快應承，並出任港科院創會贊助人兼院長高級顧問。港科院成立當日，與港科院對口嘅中科院院長白春禮亦有出席。
外界經常話香港欠缺創新人才，Jonathan話未必係咁，因為香港仍有唔少土生土長、講廣東話嘅科學家，佢希望港科院成立後，可以做多啲貼近社會嘅科研活動，以提升年輕人對科技嘅興趣。