中環出更：「良」方抗寒冬 善用優勢留旅客
香港零售市道步入寒冬，除咗經濟轉弱影響消費外，中港矛盾引發嘅趕客行動亦是致命傷。職業訓練局日前舉行畢業典禮，有七位社會名人獲頒授榮譽院士銜，包括時裝設計師鄭兆良（Barney）。Barney話，喺佢接觸嘅客人之中，最豪氣最有品味就係內地客，而非香港人，佢認為抗拒內地人來港消費，等如將呢班客人趕去歐洲或日本購物，無疑是自毁招牌。
Barney同香港知專設計學院合作多時，對於該校畢業生出路，佢持樂觀態度，因為時裝界喺資訊科技帶動下，為年輕新進提供機遇。例如昔日嘅時裝設計師務必要進入知名品牌，才能展現才華，但喺網購潮流下，設計師只需要與購物網站合作或自設網站，個人作品就可以好輕易送達世界各地嘅消費者手上，加上內地市場龐大，所以依家上位機會絕對勝過往昔。
另一位獲頒授榮譽院士銜係昂坪360董事總經理關敏怡（Stella）。面對旅遊及零售業吹淡風，Stella話涉及好多因素，例如經濟不景降低旅遊意欲，周邊國家放寛簽證限制，加上好多外幣貶值，攤薄香港吸引力。
業界需新思維
要應付現時挑戰，佢話除咗業界要做好本分外，大家亦都要度吓新思維，例如香港旅遊賣點，唔可以再停留喺飲食同購物。
Stella又話，香港既有城市繁華璀璨一面，亦具有獨特嘅自然風光，以及地道生活文化，呢方面只要善加利用，可以成為吸引遊客嘅旅遊資源。和富社會企業會長李宗德亦係榮譽院士之一，佢喺澳洲留學嘅細女亦專程返港捧場，加上太太、大女李美辰及女婿蔡德昇打氣，令佢感到非常窩心。
卓妮