北角：僭建「空中花園」遲未取締
「明明呢度係鬧市中心，點解可以冇喇喇起多個『空中花園』出嚟？呢頭啲樓都有番咁上下樓齡，話唔埋有一日頂唔住，冧落嚟就大件事！」北角居民李太指，英皇道有大廈平台僭建，除構築物外，亦廣植植物，擔心大廈結構不勝負荷，「啲植物好聚水，如果造成滲漏嘅話，就更加危險。」
「業主當清拆令係廢紙」
屋宇署發言人證實，涉事僭建物已記錄在案，會按《建築物條例》規定，向有關業主發出清拆命令，着令清拆有關僭建物，並承諾會繼續跟進。
李太指涉事僭建物已存在多時，現時仍未見被取締，認為屋宇署執法緩慢，變相縱容違法業主，造成區內僭建問題日益嚴重，「幾乎成區舊樓都有僭建，基本上啲業主就當清拆令係廢紙，一啲阻嚇力都冇！」