「望着海一片，滿懷倦，無淚也無言」唱出唔少港人嘅心聲，事關香港一向以美麗海岸線聞名。可惜吖，唔知幾時開始搞到成個海係垃圾，而且多到執極都執唔完，市民想唔喊都唔得啦。
呢，有環保組織搞咗個海岸清潔運動，年年都大有「收穫」，今年亦唔例外，超過三千名義工喺全港多處沙灘海岸收集垃圾，足足執到超過四千幾公斤。當中五成係發泡膠及塑膠製品，同玻璃碎片位列十大海洋垃圾「三甲」。呢啲垃圾唔係天跌落嚟，正如環團話齋，唔少海洋垃圾係來自岸邊嘅康樂活動，可見使用海灘人士嘅公民意識有幾唔掂，真係睇見都眼冤呀。
話時話，海洋垃圾成災，早已經唔係新聞啦。港島南區石澳鶴咀就係出晒名嘅「垃圾灣」嘞，由於風向問題，海洋垃圾愈積愈多，仲堆積咗一座深可及膝嘅「垃圾山」添，搞到臭氣熏天，生人勿近咁滯。
係人都知，海洋污染嚴重影響生態，大家唔好以為唔關你事呀，好似西貢沙灘曾經發現一具綠海龜屍體，經剖驗後發現海龜胃部及腸道充斥大量垃圾，尼龍繩、膠條及包裝袋等等，簡直要乜有乜，無奇不有。試諗吓，連長壽嘅龜類都頂唔順，如果魚類食咗海洋垃圾，好可能間接令有毒物質進入食物鏈，當人類長期食用受污染嘅海洋生物，到頭來攝取咗有毒物質都唔知，最終只會自食其果嘅咋。
其實，家陣唔止海洋充斥大量垃圾，陸上嘅郊野公園亦唔好得幾多嘅咋。話說漁農自然護理署早前推行「自己垃圾自己帶走」計劃，大幅減少行山徑垃圾桶數量，話就話鼓勵郊遊人士自行清理垃圾，可惜宣傳教育嚴重不足，結果好事變壞事，搞到漫山遍野係垃圾，有外國遊人睇唔過眼幫手執垃圾，你話係咪失禮死人呀。
最好笑嘅係，港人近年經常嘲笑內地旅客各種不文明行為，郁啲拍片上載進行網絡欺凌，唔知嘅以為香港市民全部有潔癖。唔講唔知，現時全港每日丟棄近一萬六千噸垃圾，重量等同一千部雙層巴士，呢啲咪五十步笑百步囉。
當然啦，要搞好環境問題，市民固然要自律，但港府亦有不可推卸嘅責任。問題係當局口口聲聲重視環保，但講就天下無敵，做就有心無力，官僚任由污染問題惡化，所謂環保根本係大隻講。
講到底，美麗嘅海岸線同優美嘅郊野公園，係香港不可多得嘅天然資源，香港一日唔掃走班垃圾官僚，遲早變成「垃圾港」，到時實聽「閻羅王探病」——問你死未！