俗稱「網絡廿三條」嘅《二○一四年版權（修訂）條例草案》今日喺立法會恢復二讀，本來支持原草案嘅資訊科技界議員莫乃光（Charles），喺網民壓力下都急急轉軚，聲言若泛民提出嘅修訂遭否決，佢就反對原草案。其實莫乃光都唔係第一次做夾心人，喺創新及科技局撥款申請上已多次成為磨心，身為業界代表，一方面支持成立創科局，但另一方面又阻止唔到激進泛民主派「拉布」。Charles喺兩件事都左右為難，被夾完又夾，睇嚟唔做議員先可以逃出生天。
