政情：葉劉再起「跑道」 增青年機遇
立法會議員葉劉淑儀早前藉其前愛將陳岳鵬加入政府，仲升任政制及內地事務局副局長，大吐苦水話好多年輕人當佢係「跑道」。不過，早前成立海上絲綢之路協會嘅葉劉，尋日就宣布協會下另設青年機遇委員會，計劃為本地大學生提供一百個實習機會，名正言順另起跑道幫學生前途鋪路。
提供世界各地實習空缺
葉劉成立不但搵咗恒基地產副主席李家傑出任該會主席，仲邀請「玩具大王」蔡志明兒子蔡加讚同大律師兼「香港青年專業網絡」主席容海恩等人任協會副主席。葉劉透露已經喺世界各地搵咗唔少暑期實習機會，工作地點包括內地及多個國家，涵蓋多個行業，至今已經搵到七十個空缺，明年一月起接受報名。
協會聯席主席之一、行政會議成員陳智思都出力支持，但佢旗下亞洲金融集團只係提供兩個實習名額，到佢泰國嘅酒店項目實習，似乎少咗啲喎。