金融服務界立法會議員張華峰（肥張）自爆，曾經被冒認全國政協委員黃楚標嘅騙徒，透過電話呃咗佢九萬元人民幣，之後呢個扮成黃楚標嘅人逃去無蹤，公眾當然希望早日將騙徒繩之於法，以免再有人受害。不過，到底肥張有冇盡到好市民責任去報案為警方提供破案線索，到依家都係一個謎。
聽聞肥張尋日上午會去灣仔警察總部報案，但係我哋喺警察總部外等咗全個上午，都唔見肥張嘅身影，未知佢到底係改咗時間報案吖，定係改咗去第二間警署報案？抑或根本冇去報案呢？
肥張四月曾經喺傳媒面前，打電話以每股二百六十幾元，買入十萬股港交所股份，仲話睇好可以升到四百元，結果港交所一度跌破一百七十元，到依家仲喺二百元上上落落。今日唔見肥張報案，莫非九萬元人民幣對佢嚟講真係太濕碎？定係怕報案嘅話，會揭露更多政商界名人曾經受騙，擔心影響聲譽，所以唔敢報案呢？