【本報訊】「畀着你無啦啦屙條膠管出嚟，你話驚唔驚？」黃伯大便排出膠管，全家都受驚。女兒黃小姐對院方輕描淡寫的回覆仍感不滿，同時認為院方的答案不合理，「如果我阿爸一早知會屙條膠管出嚟，佢就若無其事，點會覺得咁有問題！」並稱院方回應「都係一面之詞，佢講乜都得啦」，認為「醫院好似覺得係一件小事，但對病人嚟講係一件大事」，將心比己，「如果你係呢件事主角你又驚唔驚？」
黃小姐表示，父親以前從來無做過手術，今次膽管內窺鏡手術為他的「第一次」，不料惹來一場驚魂，而他在發現排出膠管後甚為驚慌及好驚，自己亦替爸爸擔心，同時感匪夷所思，一度以為是手術出問題，恐發生類似早前有醫生在術後遺留紗布在病人體內的事故，「唔通自己食條膠管落肚咩！」黃小姐續稱，爸爸年紀大，即使經記者口中得知排出膠管是術後可能發生的情況，但仍感「唔開心」，直言對廣華醫院失信心，她亦覺得要公開事件讓大眾知悉，現階段只希望爸爸身體健健康康。
病人政策連線發言人曾建平指出，今次個案明顯是醫患溝通不足，「病人唔係醫生，唔會識晒所有嘢；即使醫生講咗，有無問番病人明唔明」。他希望病人的知情權獲得充分尊重及保障。曾建平又說，不少的投訴與醫患溝通不足有關，只要醫生在病人接受治療前，可以將治療解釋清楚，凡事多說一、兩句，便不會發生這些誤會，「醫生以為簡單、小事，病人唔知就係唔知，今次個案就無辜嚇餐死」。
關注病人權益的社區組織協會幹事彭鴻昌表示，醫生應該設身處地，站於病人的立場去反觀事件，如果病人在無心理準備的情況下，在手術後突然排出異物，的確會擔心當時的手術有「甩漏」。