「兜兜轉轉，原地踏步」，呢八個字可以話係本港教育改革嘅最佳寫照。好似中學文憑試文言範文咁吖，自○七年取消後，學生中文水平不升反跌，當局見唔對路，宣布重設範文，學生好似白老鼠咁任人舞，都咪話唔無奈。
教育局早前完成高中新學制中期檢討課程及評估，並上載各科更新嘅課程及評估指引，中文科今年將新增十二篇文言文範文供中四生學習，其中包括《念奴嬌‧赤壁懷古》、《岳陽樓記》以及《廉頗藺相如列傳》等經典名篇。而到咗二○一八年文憑試嘅「指定閱讀篇章」部分，將會涵蓋多達七篇文言範文。教育局仲講到明，希望學生透過背誦優秀學習材料，特別係指定文言經典篇章嘅精華片段，提升語文能力添。
早知今日，何必當初。當年教育局取消文言範文，吹到天花龍鳳，話要免卻學生死記硬背之苦，發揮學生創意思維，點知事與願違，學生係就係有「創意」嘞，弊在用錯地方呢。啱啱過去嘅文憑試，有考生將「口腹之慾」寫成「口『福』之慾」，亦有考生將「惻隱之心」寫成「『側忍』之心」，五花八門，無奇不有，真係唔到你唔服。
冇錯嘞，學習任何知識，死記爛背都係最基本嘅入門功夫，學數學要背九因歌，學英文要背字母文法，學化學要背元素周期表，語文亦唔例外，開講有話，熟讀唐詩三百首，不會作詩也會吟。其實，好多大文豪大作家都對背誦經典推崇備至，巴金十歲嗰陣已經將《古文觀止》二百多篇文章倒背如流。佢老人家晚年回憶，之所以能夠寫出咁多不朽作品，全靠細個背書背得多日子有功。港產官僚鼠目寸光，奪走學生學習語文嘅養分，都唔知扼殺咗幾多未來文壇巨匠，簡直罪過罪過。
點都好喇，官老爺終於肯撥亂反正，總好過死牛一便頸，擇惡固執。家陣冇嘢怕，最怕官僚眼高手低，添煩添亂。你知喇，中文科文憑試有名你叫「死亡之卷」，就係因為考評局烏龍百出，甩漏多多，學生畀佢哋玩死，之前試過有閱讀理解題目不知所云，連原作者都一頭霧水，嚟緊就範文出題，唔知又會幾騎呢，咪一陣又搞到怨聲載道，範文設完又撤，到頭來又係搵着學生嚟搞嘅咋！
講起都幾悲哀，回歸十八年，教育政策五時花六時變，文言範文係咁，教學語文亦係咁，一時母語教學，一時語言微調，一時英中落車，結果愈改愈亂，愈改愈衰。班高官搞到一鑊泡，就話可以送晒啲仔女去外國讀書，冇眼屎乾淨盲啫，小市民肉隨砧板上，除咗硬食仲可以點呢！