金融服務界立法會議員張華峰自爆，曾經畀冒認全國政協委員黃楚標嘅騙徒，透過電話呃咗佢九萬蚊，不過佢呢九萬蚊當係買個教訓，未有要求黃楚標賠錢。咁又係嘅，記得張華峰今年四月與傳媒飯局時，曾經即場打電話以每股二百六十幾蚊，買入十萬股港交所股份，仲話睇好可以升到四百蚊。結果港交所一度跌破一百七十蚊，到依家仲喺二百蚊附近上上落落。若果大家當時跟佢買咗又冇及時斬纜，隨時仲傷過畀人電騙！
