政情：袁國強復工 面青口唇白
特區問責班子最近多災多難，先有律政司司長袁國強因腸部不適入院多日，到前日又輪到食物及衞生局局長高永文跑步時仆親一度入院，要休息最少兩周。袁國強尋日終於病好復工，但見佢會見記者時雙目無神，面青口唇白，答問題時亦氣若游絲，睇嚟仲未完全康復。
袁國強透露，早喺上月廿九日已出現肚痛，拖咗兩日到上周一去求診，當時醫生已話再唔好就要入院，但翌日返工時個肚又再痛過，最後要入院「落重藥」治療同接受電腦斷層掃描（CT Scan），直至上周五先可出院，依家仍要服藥同覆診。
死撐病情唔嚴重
不過，袁國強死撐目前病情唔嚴重，能夠應付工作。問佢係咪因為壓力大而出事，佢就話壓力一向都有，但自己當年私人執業時壓力都好大，暗示唔係因為入咗政府呢個「熱廚房」先至出問題。